സ്നേഹത്തോടെ ഭരണകൂടത്തിന് ..

സര്‍,
സുഖമല്ലേ ? നേരമ്പോക്കിന് പിന്നേം മാവോയിസ്റ്റുകളെ വേട്ടയാടാനിറങ്ങി എന്ന് കേട്ടു. മുമ്പൊരു വേട്ടക്കാലത്ത് അങ്ങുന്ന് പിടിച്ചു കൊണ്ടുപോയ ഒരധ്യാപികയെ ഓര്‍ക്കുന്നോ, 2011 ഒക്ടോബര്‍ 4 ന് മാവോയിസ്റ്റുകള്‍ക്ക് വേണ്ടി പണം പറ്റിയെന്ന് ആരോപിച്ച് ഡല്‍ഹി പോലീസ് അറസ്റ്റ് ചെയ്ത് ഛത്തീസ്ഗഢ് പോലീസിന് കൈമാറിയ സോണി സോറിയെ ?

ജില്ലാ പോലീസ് സൂപ്രണ്ട് അങ്കിത് ഗാര്‍ഗിന്‍റെ നിര്‍ദ്ദേശപ്രകാരം ഷോക്കടിപ്പിക്കുകയും സൂപ്രണ്ടിന്‍റെ സാന്നിധ്യത്തില്‍ നഗ്നയാക്കി നിര്‍ത്തി പോലീസുകാര്‍ കൂട്ടബലാത്സംഗം ചെയ്ത് ജീവച്ഛവമാക്കുകയും ചെയ്ത സോണി സോറിയെ? മറന്നു കാണും, അങ്ങേക്ക് തിരക്കല്ലെ. ഓര്‍മ്മിപ്പിക്കാം, സോണിയുടെ സ്വകാര്യഭാഗങ്ങളില്‍ കുത്തിയക്കയറ്റിയ നിരവധി കല്ലുകളില്‍ മൂന്നെണ്ണം അന്ന് ഡോക്ടര്‍മാര്‍ പുറത്തെടുത്തു. കടുത്ത അണുബാധയെത്തുടര്‍ന്ന് ദീര്‍ഘകാലം അവള്‍ മരണാസന്നയായി കിടന്നു. അവളെ പീഡിപ്പിക്കുന്നതിന് നേതൃത്വം നല്‍കിയ എസ്.പിഅങ്കിത്തിനെ 2012 ജനവരിയില്‍ വിശിഷ്ട സേവാ മെഡല്‍ നല്‍കി അങ്ങ് ആദരിച്ചുവല്ലോ, അന്ന് രാജ്യസ്നേഹം കൊണ്ട്‌ എനിക്ക് രോമാഞ്ചമുണ്ടായി. ഇനി ഏതു പെണ്‍കുട്ടിയെ ആണാവോ അങ്ങ് നിയമപാലകര്‍ക്ക് കൂട്ടിക്കൊടുക്കാന്‍ തീരുമാനിച്ചത്,

പുച്ഛമാണ് സര്‍, അങ്ങയുടെ രാജ്യത്തില്‍ ജീവിക്കാന്‍ ലജ്ജയാണ് സര്‍.